السفة المردومة أو المدفونة بالدجاج والزبيب :
المقادير:
شعرية الرقيقة نتاع السفة حسب الرغبة.الزبيب.
نصف دجاجة.
3 بصلاة مقطعين مربعات صغيرة.
شوية قصبر ومعدنوس معقودين.
الزيت.
الملح.
حبة كحلة(إبزار).
سكين جبير.
خرقوم.
قرفة.
سنيدة.
الطريقة:
- نخدو قصعة نديرو فيها الشعرية وندهنوها بالزيت مزيان ونديروها تفوار 15 دقيقة
- نخليوها تفوار ونشدو الكوكوط نديرو فيها شوية الزيت والدجاج والبصل
- والملح منكتروش الملح حيت مغاديش نخليو فيه المرقة ديال الدجاج غدي نشفوه مهم الملح والخرقوم نقليو مزيان
- ونضيفو شوية الماء لي يطيبنا داك الدجاج
- ونديرو شوية حبة كحلة شوية سكين جبير وشوية قرفة وربيع ونسدو الكوكوط حتي يطيب الدجاج
- مبعد ما يطيب نحيدو الدجاج نخليو يقطر ونحيدولو لعظام وجلدة ونفتوه شوية شوية
- ونشعلو على الكوكوط ونردولها الدجاج ونديرو عليه واحد 2 معالق كبار سنيدة وشوية الزبيب ونخليوها على نار مهيلة تشحار حتى تنشف وتعسل
- ومن بعد نحيدوها على النار ونخليوها إلى حين التقديم.
- نرجعو للشعرية مبعد ما فورت ربع ساعة نحيدوها نخويوها فلقصعة ونرشوها بالماء مزيان ونخليوها حتى تشرب
- من بعد نردوها لكسكاس تفوار 15 لدقيقة أخرى
- ومبعد 15 دقيقة نعودو نخويوها فلقصعة ونحلوها مزيان بين يدينا ونرشوها بالماء ونديرولها الملح ونخليوها تنشف
- ونردوها تفوار 20 دقيقة
- ومبعد ما دوز 20 دقيقة نحيدوها ونخويوها فلقصعة ونفورو الزبيب ونديروه عليها ونديرولها شوية سنيدة وندهنوها بالزبدة مزيان
- والتقديم حسب الرغبة أنا استعملت طبصيل عادي و درت طبقة شعرية وطبقة نتاع الدجاج وزبيب والبصل ونغطيوها بطبقة ديال الشعرية،
- كما يمكنك استعمال المول ديال الكيكة و تعملي نفس العمل ديال الطبقات ونتكاو عليها بيدينا مزيان ونقلبوها فطبسي
- التقديم والتزيين حسب الرغبة مثلا بالبيض و القرفة و اللوز ...
@lcozina
